ActualVista detagliada

Il Grischun n’è betg mo il chantun da las 150 valladas e 100 lingias d’autos da posta, mabain era il chantun dals museums. Passa 70 museums – davent dal pitschen museum regiunal enfin al renumà museum d’art – fascineschan las visitadras ed ils visitaders cun lur exposiziuns. Ils giasts dal Grischun pon da nov era profitar da la suandanta purschida attractiva: in bigliet cumulà per ils museums da Cuira cumpiglia in viadi cun ils meds da transport publics a Cuira ed enavos al lieu da partenza, e l’entrada en dus dals trais museums impurtants dal Grischun: il Museum d’art dal Grischun, il Museum retic ed il Museum da la natira dal Grischun. Sper la visita dals museums carmalan la bella citad veglia da Cuira e las numerusas butias. Las persunas interessadas a l’art han ultra da quai la pussaivladad da visitar il Forum da cultura Würth che preschenta exposiziuns ambulantas d’art internaziunal (entrada gratuita).
Il bigliet cumulà per ils museums da Cuira pon ins cumprar a tut las staziuns dal Grischun e directamain en l’auto da posta. La purschida è in emprim resultat da la collavuraziun dals Museums Grischuns, d’AutoDaPosta Grischun, da la Viafier retica e dal marketing da cultura dal chantun Grischun. Planisadas èn era ulteriuras purschidas en autras regiuns dal Grischun. Link: Bigliet cumulà per ils museums da Cuira