Perlas culturalasVista detagliada

Giudair diesch dis la naiv e represchentaziuns umoristicas sin 2000 meters sur mar: dapi prest 20 onns vegn organisà ad Arosa avant Nadal il renumà Arosa Humor-Festival, la pli gronda occurrenza da comedy e d'art cabarettistic da la Svizra.

Sin la tribuna dal festival èn sa preschentads ils ultims onns tut ils artists da num e pum. Cumediants enconuschents da la Svizra èn stads per exempel ils Acapickels, il Duo Fischbach, Gardi Hutter, Marco Rima, Massimo Rocchi ubain Ursus und Nadeschkin. Da l’exteriur èn arrivads en l’anteriur vitget gualser entadim il Scanvetg artists sco Josef Hader, Michael Mittermeier, Dieter Nuhr, Gerhard Polt ubain Helge Schneider.

Las represchentaziuns da la pli gronda occurrenza culturala dal Grischun na vegnan però betg mussadas en il vitg turistic enconuschent, mabain pli ad aut: en ina tenda da circus installada aposta per il festival gist sper la chamona da Tschuggen, amez il territori da skis. Ad Arosa na sa preschentan durant quels dis dentant betg mo cumediants e cabarettists renumads, anzi, il festival serva era sco plattafurma per giuvens talents. Las aspectaturas ed ils aspectaturs cuntanschan la tenda cun la pendiculara ubain a pe, e pon pli tard era returnar en il vitg cun scarsola u cun skis.

Contact:
Arosa Tourismus | Poststrasse | CH-7050 Arosa| Tel. +41 81 378 70 20 | arosa@arosa.ch | www.humorfestival.ch

Infurmaziun per turists:
Mintgamai a partir da la fin da fanadur pudais Vus empustar bigliets en cumbinaziun cun ina pernottaziun en in dals hotels dal festival. Ils hotels e las purschidas chattais Vus sut www.humorfestival.ch , en la rubrica “Hotels”, u tar
Arosa Turissem
Via da la Posta, 7050 Arosa
tel. +41 (0)81 378 70 20
arosa@arosa.ch | www.arosa.ch