grischunCULTURA: eveniments nunemblidaivels
Il Grischun n'è betg mo il chantun da las 150 valladas, dals pizs spectaculars, dals glatschers grondius, dals lais da muntogna idillics e dals vitgs pittorescs. Il Grischun ha era da porscher numerusas perlas culturalas. En lieus fascinants ed inscenaziuns surprendentas. Cun gronds talents ed artists excepziunals. Ed en ina qualitad extraordinaria. Il Grischun – la pli bella culissa per la cultura. Prendai plaz, per plaschair.
Per exempel en ina da las numerusas represchentaziuns da musica classica u en in teater da musica al liber davant la culissa muntagnarda imposanta u in chastè. Forsa avais Vus era gust dad ir a teater u da passentar ina sairada umoristica. Las tribunas tranter Cuira (593 m) ed Arosa (2000 m) porschan blera variaziun.
Vulessas Vus pli gugent ir a guardar in'exposiziun? Alura avais Vus ina gronda elecziun. Ils museums d'art dal Grischun preschentan ovras d'artists indigens renumads sco Segantini, la famiglia Giacometti u Ernst Ludwig Kirchner. E sche Vus As interessais per l'architectura contemporana: il Grischun è sa fatg ils ultims decennis in num sin plaun internaziunal cun architects sco Peter Zumthor, Bearth & Deplazes u Gion A. Caminada.
Tuttina tge gener da cultura che Vus preferis: nus As giavischain en mintga cas in bel segiurn en il Grischun cun bleras impressiuns fascinantas. Il Grischun – la pli bella culissa per la cultura.
Telechargiar la broschura «Graubünden – die schönste Bühne für Kultur».
