Davart grischunCULTURA

Bleras persunas interessadas a la cultura enconuschan mo per part l'activitad culturala multifara e qualitativamain auta dal Grischun. Quai vala tant per ils giasts da vacanzas sco era per persunalitads impurtantas dal manaschi d'art e da cultura svizzer. Per els sco era per tut las Grischunas ed ils Grischuns interessads a la cultura avain nus creà questa pagina Web. Qua survegnis Vus ulteriuras infurmaziuns davart il concept da grischunCULTURA, la realisaziun da la pagina Web sco part da la rait dal server da cultura, sco era davart la collavuraziun cun partenaris dal turissem.

La plattafurma d’Internet en las trais linguas chantunalas ed en englais pussibilitescha tant a la populaziun indigena sco era a giasts u giasts potenzials dal Grischun da s’infurmar davart la purschida culturala d’in lieu u d’ina regiun. En questa moda duai l’activitad culturala en il Grischun vegnir percepida meglier – ed uschia s’augmenta forsa era il dumber da giasts interessads a la cultura.

Ils organisaturs d’occurrenzas ed ils producents e las producentas da cultura endateschan las infurmaziuns a moda decentrala davent da lur computer. Per l’ina survegnan ils utilisaders e las utilisadras uschia infurmaziuns d’emprim maun, e per l’autra han las organisaziuns culturalas ed ils producents e las producentas da cultura la controlla sur dals cuntegns e l’actualisaziun da las datas. L’Uffizi da cultura surpiglia lavurs redacziunalas e s’engascha, en collavuraziun cun ils furniturs e las furnituras da las infurmaziuns, per texts interessants, cumplets e qualitativamain auts. Dasperas è el responsabel per l'elecziun da las attracziuns.

Il barat da las datas dad occurrenzas cun ils secturs da turissem e da las purschidas gia existentas en il Grischun (a partir da la primavaira 2006), augmenta la qualitad da las infurmaziuns e porta in respargn da lavur. Links a las paginas Web da las destinaziuns turisticas tar tut las endataziuns da grischunCULTURA optimeschan la rait tranter la cultura ed il turissem.

ProducentAs da cultura ed organisaziuns culturalas profiteschan entaifer la plattafurma da cultura da servetschs supplementars, che rendan attractiva la participaziun: per exempel in’atgna adressa dad e-mail, spazi Web gratuit ed in modul pagina Web per crear a moda simpla in’atgna pagina Web en l’Internet.